牛油果

　　並不是喜歡講以前，而是想找一個比較。

　　小時候沒有多餘錢，那時的果汁多數只有橙汁鮮蔗汁西瓜汁蘋果汁等，基本上全部飲唔起，因為太過奢華，飲不如食，食個橙自然有橙汁，偶然母親會買十多二十個唔多靚的橙回來榨汁，整個過程好過飲杯橙汁，最後連渣都食埋。

　　近二十多年唔使講，世界物資豐富，連奇異果汁和牛油果汁都有供應。說實在，奇異果榨汁真係浪費，牛油果可以榨汁，真係想知汁從何來？

　　就算到了今天，仍覺飲杯果汁屬於高消費，中環寫字樓用來招呼客人，或者給自己一個獎勵才會飲杯新鮮果汁，不然去涼茶鋪飲杯竹蔗水潤一潤算了。

　　聽聞種植牛油果需要很多水份，多產於第三世界，不知道是否收購價低而又能利潤高，所以宣傳多說營養豐富兼對身體有益還可纖瘦，好過食傳統食物及水果，甚至可以當飯食，結果大受女士歡迎，個個趨之若鶩，十幾廿蚊個幾十蚊個都有，是否真的咁有功效，相信無人知道。

　　雖然食落有甘甜味道，偶然用來配合奇妙醬雞蛋拌成沙律醬搽在麵包上，加片意大利火腿，幾種味道混合能增加食慾，再加杯牛奶咖啡，順其自然食多一塊半塊麵包，應該可以用來抵銷牛油果能夠纖瘦的功效。