西瓜

　　母親很喜歡西瓜，大熱天時從雪櫃取出來，然後大口大口嚼，那份消暑與滿足，非其他水果所能代替。

　　小時候西瓜多來自台灣，大陸亦有很多包括豬仔瓜，不過多數有核，食時比較麻煩，但也是樂趣。

　　近年少見了台灣，唔知運晒去邊，反而大陸品種多了，以編號來分類，至於邊個冧把才夠甜好味則唔多覺。

　　早幾年香港仔有檔水果鋪，專門出售馬來西亞西瓜，一個切開四塊，每塊二十元，全個買要八十元。切開鮮紅兼無核，顏色吸引，初時買半個，後來改為買一個——那時還可以拿得動。

　　過得兩三年，二十元一塊變廿五，每個變成一百，因為母親喜歡，所以每次都係買一個，一個約有二十磅，平均計五蚊磅，不可以講太貴，但肯定唔平。

　　這兩年因為肺炎個個唔鍾意出街，亦全力執行打擊霸佔街道販賣行為，於是生果鋪結束營業，至於搬到哪裏因為已不在香港仔返工所以唔多清楚。

　　前兩天經過附近街市，見有出售馬來西亞西瓜，也不計太重恐拿不動，決定以一百一十元買一個回家，切開分半放入雪櫃，母親見顏色鮮紅又無核，不知幾咁高興。見她開心的樣子，捧西瓜的勞累亦一掃而空。