雲

　　早上醒來，看着天空一片雲彩。

　　處暑已過，天氣仍然炎熱。有說立秋與處暑之間稱為爭秋奪暑，這段期間比起夏天更為酷熱。

　　八月中已有人講開學時會打風。大佬呀，今日都未過，一陣落雨出太陽都未知，十幾日前已講定十幾日後的事，天文台都無咁準，難道打風落雨就唔使讀書？

　　有人拿張電費單出來，證明自己沒有用冷氣。這個人咁喜歡公開自己的私隱，應該在他家中安裝多部鏡頭，好像真人騷一樣全日二十四小時直播，才能證明沒有使用冷氣的原因。

　　正常天氣下，家中兩個人，沒有使用冷氣，再加特區政府電費補貼與回贈，電費為負數並不出奇。

　　未有電風扇之前，人手一把扇，有了風扇後，專家——注意係專家——會寫文章或後來上電視，講吹得風扇多對人體有害，直至冷氣機普及，再無講風扇之禍害，改為講冷氣。

　　人類發現火種開始，究竟熟食對人類有無害？開始時燒木，後來燒煤，再後來燒石油，至現在核電，將來會係點我們（螻蟻）無可能知道，但有人卻告訴我們為了減少碳排放而減少使用冷氣——只係冷氣。

　　讀得書多的人係唔同，甚麼碳排放，甚麼可持續發展，甚麼地球暖化，之後又地球回到冰河時期，講完成群螻蟻都唔知佢講乜，只係證明佢地讀得書多，識多幾個由他們創作的名詞而已。

　　都係唔好理咁多，珍惜眼前所見的一切，已經足夠。