就在這一天

　　幾個月前，偉大的特區政府某個局（名字太長，記不起）的局長（更加記唔起）發表了特區將來偉大藍圖，名為想要藍天，減少碳排放。
　　如何減少碳排放？首先將發電廠原來用煤來發電，將改用天然氣，這樣一年可以減少唔知幾多噸碳排放；又話如果在天台種花草樹木，又可以減少唔知幾多噸碳排放；如果每個市民日日唔用私家車，連巴士都唔搭，全部改坐地鐵火車，又可以減少很多噸碳排放。
　　這裏減多少，那裏減多少，每個人都減多少，之後又綠化天台、綠化馬路（因為馬路已經無車行）、綠花辦公室，總之全部都綠化之後，之後……之後三五十年之後，我們香港人，特別注意是香港人，每個香港人可以長壽兩個月命。
　　無錯，是兩個月命！至於點計出來就真係一個謎。
　　總之唔好理咁多，可以長壽，人人都應該盡盡責，一切以節約為先，於是一於天黑不點燈，就算是一張廢紙都要寫完再寫寫無可寫先至掉，搭巴士搭到盡頂多行番轉頭，甚至電視都唔睇、收音機唔聽、手提電話唔用，差點連飯都唔食，無非都是想減少碳排放。
　　努力了幾個月，應該都可以減少幾噸碳排放，也許可以長了一分半分鐘命，唉，怎知就在這一天……
　　那個甚麼東亞共榮圈運動會，要唔知幾多個世界第一來搞開幕，最終當然又要放煙花。一放煙花，你話又產生幾個噸碳排放，說甚麼三五十年後會長命兩個月，現在特區政府已經短多幾個月命！