餘下甚麼……

奠定勝局的一球十二碼

　　星期六無節目，最好就係瞓吓覺，五滋六味口水流流時突然電話響起，「喂，有香港對日本波飛，睇唔睇？」星期五晚特區政府不是已經宣布全場爆滿嗎？怎會還有飛？「免費派㗎，咁睇唔睇吖？」免費？唔使錢最啱大鄉里，一於去睇。
　　約四時半來到銅鑼灣，人山人海，分不清人群是去睇波還是行街購物，沿加路連山路前往，滿街警察煞有介事，卻不是維持秩序，躲在一旁閒談散步。漸近大球場，球迷越來越多，個個歡天喜地，那種興奮看來都是可以免費睇波，無你咁好氣，個個排隊攞禮物（其實只係兩支氣棒），一於坐番個好位。
　　都話唔好坐係個阿伯隔離，佢以為自己睇咗幾十年波，未開波已經係度講，講日本隊只係出青年軍，話成隊副選都可以贏，又講特區香港隊如何差，點會贏日本。開咗波仲慘，日本進攻又話日本點好波，特區香港進攻又話斷哂纜，連龍門開球門球都開到好似死老竇咁。如果不是兩隊都係咁廢兼且免費睇波，否則一定起身教訓吓佢。
　　上半場雖然畀日本入了一球，但悶了半場，又話主場可以踢高兩三班，見特區香港隊好像無心戀戰，日本班後生仔又似練緊波，正在猶豫好唔好離場返屋企，點知下半場一開波，日本隊發緊夢之際畀特區香港頂入一球，情況立刻改變，身旁兩個後生仔終於一吐烏氣，似有向阿伯反擊之意，大叫好波。
　　雖然特區香港最後互射十二碼時取勝，但縱觀整場比場並不精彩，乘主場之利取勝是合理戰果，可惜踢來毫不積極，又不是沒有機會，一個突擊已可入球，奈何總不見嘗試。以作客入球雙計，這場球賽能拿下金牌，球迷的熱情不無功勞，至於那班事後抽水的特區政府官員可以不理。
　　從一場球賽便可以知道特區政府的醜陋心態，贏波興高采烈，但問他們認不認識球員的名字時就個個都唔識。說要支持體育運動，想入場觀看的卻不能購票，處處派飛卻不能全場滿座，足證香港已死，只餘下特區。