飛行

　　兩隻細最鍾意去旅行，除了可以坐飛機，另外就是可以食飛機餐。
　　坐大陸飛機不用說，初時唔知只得一包花生或是一包糖，粒糖溶溶地還黐住張包裝紙，想飲杯水時空姐是拿著一個茶煲出來，四出問要不要加茶水。改革開放後好多了，一人一個餐盒，正餐時可以有飯吃，其他時段則多數是糕點，包裝已經比以前好多了。
　　第一次坐長途機，是乘意大利航空，吃甚麼早已忘記，不過肯定不是中菜，因為話晒都係外國航空公司，有西餐唔食食中餐？沒有理由吧。第一次坐起過十小時的飛機，睡唔睡得著係次要，最重要係過得兩三個鐘，又有雪糕供應，隔一陣又有杯麵食，得閒又可以走去問空姐要杯果汁，食多過瞓，都唔知幾舒服。
　　新加坡航空個個都話好，個機場確是幾舒服，坐係安樂椅休息瞓到幾乎唔記得上機。服務好是一回事，座位狹窄是波音飛機的問題，飛機餐亦不錯，可是那個包……除了每人一個的是獨立包裝之外，再添加的則是從一個大膠袋中取中，雖然已經烘熱，不過感覺上始終差了點。
　　回想乘SAS航班飛丹麥，機上供應的麵包是用籐籃盛載，款式幾種，有充滿牛油香味的牛角包，也有鬆軟的提子包，亦有帶麥香的鹹麵包，還有棕色的大麥圓包，不是一人一個，而是任意取用，真係食包都食飽。
　　今次乘荷蘭皇家航空，第一次嘗試飲紅酒。事緣去年乘印度翠鳥航空，航程約七個小時，竟然坐到腳痛，今趟要好好準備，一於大覺瞓，可惜去程時那支紅酒並不是太好，幸好回程時換了另一牌子，清醇一點。
　　從荷蘭阿姆斯特丹飛布達珮斯，只得兩個小時，匈牙利航空供應了三文治，兩個人可以試齊兩款口味，火腿有肉香，芝士有鮮味，一人食一半，都唔知幾好味。回程從波蘭的華沙飛阿姆斯特丹，航程縮短至一個半小時，荷蘭航空同樣提供三文治，包裝吸引，同樣美味。
　　坐在一個密閉侷促同時又非常細小的座住中吃東西，除了是高難度動作之外，還要懂得欣賞，單是那份新鮮感，永遠吸引。