倒退

  回歸十四年多，特區香港變成怎麼樣？個個西裝筆挺一副現代模樣，言行舉止卻反智低智，真係唔知點形容。
　　明年二月財政司又要發表財政預算，早前各政黨紛紛提出意見，其中一個政黨的一名老闆說希望幫助一些「低收入的中產人士」。
　　何謂「低收入的中等人士」？低收入不會是中產，中產也不會低收入。特區香港就係咁，以為係業主有份工有仔女有外傭便是中產，中產係要講生活質素和條件的，中產絕不是甚麼「低收入的中產人士」。
　　最近講緊選下屆特首，其中一個每次都說「希望有一場公平的，而且符合基本法所提的廣泛代表性選舉委員會選舉，從而選出行政長官為廣大市民服務。」
　　阿媽係女人係人都知，使唔使次次走出來都要話畀人知「我阿媽係女人」？除非佢認為佢阿媽唔係女人除外。自有所謂選舉以來，唔該問問有哪一次話唔係公平的選舉？就算極權國家共產黨，都話自己的選舉係公平公正公開。至於符合基本法云云，莫非他認為特區香港的特首選舉可以唔符合基本法？
　　最近更甚的，那些上司最喜歡改弦易轍後還要逐點解釋一番，解釋不是提點或指導，而是講個人觀點。開始時也許會懷疑自己做錯或做得不足，後來發覺並不是這樣，真正原因只不過他有權這樣做，至於合不合理，那是另一回事了。