行錯線

  一去到巴士站8P便到，樓上更有無敵海景靚位，一邊欣賞一邊享受速度。來到杏花邨，發覺巴士偏向右線，至分叉路口略為減速，奈何已經太遲，行錯線，直入柴灣。
　　唔緊要，司機反應快，轉入巴士廠小路繞了一個圈返回原有路線，一切又回復正常。
　　以往搭巴士都試過幾次行錯線，其中一次乘113，原本行公主道，分叉路口行錯衛理道，之後怎樣回復正常不清楚，因為要落車。另一次乘99，入錯往海底隧道行車線，幾乎過了海。
　　一次下班時乘N90，車長唔記得上利東邨，結果行多一大段路才能返回原有路線，那次有個乘客真係無品，由頭鬧到落車。唉，又唔係大錯，只不過阻了三兩分鐘時間，只管鬧於事無補。
　　鄉下婆遇過最離譜一次，乘99入錯海底隧道線，真係過了海，加上兩面隧道塞車，弄至遲了半個多小時。這已經不是鬧不鬧的問題，而係唔知點講。