愛祖國用國貨

 　一看到BBC中國各地民眾響應參與反日遊行這則新聞，立刻重燃愛國心，想起埋藏多年的五星紅旗，幾乎忘記的保衛釣魚台，立刻精神抖擻，誓要日本還我神聖聖土。
　　眼見今天新中國的國民如此熱血，個個喊「打倒小日本，還我釣魚台」，日本汽車個個砸，活在特區香港的小市民，沒有理由不義憤填膺，立刻以行動——罷買日貨罷用日貨——表示吾等之愛國。
　　回家一看，家中四部冷氣機全部都是日本貨——兩部日立一部樂聲一部珍寶，好彩天氣晚間沒前幾天熱，唔用冷氣無問題，拆。電視（日立及聲寶）微型音響（樂聲）雪櫃（樂聲）電飯煲（樂聲）燈膽（樂聲）電話（樂聲）決定全部唔要。
　　好彩個多士爐係法國貨，電腦係美國貨DELL，弊，部電腦剛剛換了個東芝硬碟，即電腦雖然可以遲一步拋棄，只好暫時唔用。
　　幾乎家徒四壁，入廚房將出前一丁拋入垃圾桶，公仔麵個名雖然有日本味，幸好係本港牌子本港貨，只個煮個麵煎隻蛋做午餐，但一睇，點解樽豉油係萬字醬油呀？
　　衫褲鞋襪唔知有無日本貨，無謂心大心細，於是翻箱倒籠找回三十年前的菊花牌底衫，讀書時白恤衫藍斜褲白鞋，穿得整整齊齊出門訂購國產電器和食品（最緊要係豉油）。
　　一到大堂見部電梯，真係唔知幾驚，好彩部電梯係英國通用，唔係日日上上落落十幾廿樓都幾係嘢……