起碼

 　上海男人如果願意在家弄弄小菜，做做家務修理家居，可以做得頭頭是道井井有條。
　　上海男人如果去到繁華都市十里洋場花花世界，可以比那裏的人更會弄虛作假更加滑頭，劉翔有辦你睇，影衰晒，所以有云「上海佬靠得住，豬乸都會爬樹」。
　　本來無乜所謂，你信就信，唔信就唔信，有錢大家搵，賤就賤在有班笨蛋，畀人呃咗四年，蠢到再要畀人呃多四年，連跑一場的勇氣都無，一見劉翔扮跌，立刻尖叫「oh my god」。
　　come on。
　　點解釋好呢？惟有自己呃自己，話佢一早有傷，係贊助商要佢落場，又話征戰咁多年，傷患一直都醫唔好，仲話一早已經受傷唔想跑，為了國家只好扮無傷。
　　真係偉大。
　　早年學人睇波訂足球雜誌，訪問那些職業球員，個個都強調「show business」，場上一顰一笑，一起一跌，入球時狂歡，失球時唏噓，射失扮無辜，犯錯當無事，倒地詐受傷等等，有時可能是真，有時可能是假，但千萬不要認真，因為全部都係表演。
　　不要說運動員，試問已出來工作十年八載的人，有哪一位沒有傷在身？職業運動員受傷有甚麼稀奇，講到受小小傷好似好慘咁，在場上陪跑最慘，無名無姓。
　　一個職業運動員，會不會受了傷單腳全場跳？做戲！導演老早教咗你。
　　受傷便受傷，無人唔畀你受傷，受了傷可以去醫，可以退隱，可以東山再起，可以跑個包尾回來，既然落了場，起碼都要全力演出。
　　連跑包尾的勇氣都沒有，遑論職業道德。