高人

 　以前常常以為陰曆等同農曆，後來當然知道不盡相同，農曆實際上是陰陽曆，至於如何計算，自問睇極都唔會明。
　　生活在特區香港這個中國沿海城市，做人處事跟隨西方文明社會，即係用陽曆，但唔知點解，每年有幾日，那些讀得書多唔知係未讀壞腦的高級知識分子，突然間好像精神分裂或人格分裂，又會記得起農曆，所以每逢農曆新年前後幾天，日日講甚麼「年廿八」「年廿九」「年三十」「年初一」「年初二」「年初三」「年初四」「年初五」，到了某一天，突然間又好似患上失憶，完全忘記了農曆。
　　如是者周而復始，那些人成日會問「端午節係邊日？」「七夕係邊日？」「中秋節係邊日？」「重陽節係邊日？」「新年係邊日？」「元宵係邊日？」，反而清明冬至唔會問，就係咁奇怪。
　　本來用農曆舊曆新曆夏曆陰曆陰陽曆都無關係，隨自己喜歡，但為何一年之中又會有幾日有班人特別重視，要大大個字畀人睇，的確唔係好明。
　　發明曆法是古代人類的智慧，或許今天人類喜歡如食物般反芻，以為重回民智未開的蠻荒世界，在這幾天跑出來做一個高人，如形式般告訴大家，今天是年廿八年廿九年三十年初一……