好新聞

　　失業了成年，終於有工見，遠的確是遠，係將軍澳堆田區附近，雖然只係做臨時清潔工，不過見係新聞機構，應該好易搞定。
　　來到接待處，文化單位即係文化單位，一入大堂搭電梯時已經感覺到，站在偌大的接待處，面對接待小姐，文化氣息撲面而來，說話細聲到幾乎聽唔到，俯前聆聽時差點站不穩，幸好隔離有張櫈可以扶一扶，不然失禮就唔係幾好。
　　接待小姐話還有幾個才到我，叫我坐陣先。估唔到洗廁所都有咁多人應徵，無辦法，唯有係大堂背後的坐椅上慢慢等。
　　無聊時游目四看，見牆上掛滿了得獎作品，甚麼最佳攝影，最佳設計……突然看到其中一排掛著「好新聞」的字樣，咩好新聞呢？真係好鬼好奇，於是走近一看，想瞭解甚麼才是好新聞。
　　哇，原來所謂好新聞是菲律賓旅行團被挾持，最後流血收場，死了八個人，點開槍點死都講埋……咁就叫好新聞？
　　死人冧樓愈死得人多就愈叫好新聞，這究竟是甚麼地方？裏面的會不會唔係人？都係早走早著……