今日所見

　　過了二十年，特區香港愈來愈奇怪，究竟何為進步，真係搞唔清楚。本來人追求美好，唔係有錢就叫進步與先進，好像以前用手舀水飲，後來採用以木以陶以瓷製成的用具，但不是以金造的盛器就叫進步。
　　早上搭車返工，跟著長龍排，171來到，個個上車，但前面一個跟至最前但又唔上車，阻住後面，維持秩序的工作人員問為何不上車，答話不是乘171咁話。
　　明明那條隊排171，你唔係搭卻要排在171那行，人家叫排回正確的隊伍，竟然答話171的乘客已經上晒車，現在又無人，排在這裏唔得咩。
　　下午送貨至一間半政府機構，首先經過車路入車的檢查站，行人路永遠封閉，只能行在馬路。為何如此，因為只有車路才有檢查站。第二關經過一個入口，有另一個保安員，這兩個檢查站的工作人員都比較通情達理，一般知道送貨都唔會理，只要對他們說明便可。乘電梯至十九樓才是真正的考驗，經過了兩個關卡，這裏依然重門深鎖，大門要由裏面才能開啟，否則要工作證才可入內。
　　於是打電話，電話無人聽，幸好有人從裏面出來，唔好理咁多，立刻入內，雖然未必即時找到人收貨，起碼有冷氣，好過站在樓梯之間唔上唔落又熱又焗。入內之後問人，十問九唔答或唔識，這間寫字樓裝修豪華，個個職員有自己的空間，不知是否處理一些高度機密資料，所以人與人之間全無溝通，個個要扮做才顯得自己的重要。終於要找的人從茶水間吹水回來才有人收貨。
　　出來之後乘巴士回廠，等了十分鐘，在下午時段不算太耐。車行不久停在交通燈，太陽從右面曬入車廂，這時見司機突然站起身步出駕駛室，企圖避開熾熱的太陽。巴士雖然已停定亦拉好手掣，而且今天的特區香港幾乎全部巴士都有冷氣，停在交通燈大概都只是一分鐘，曬一陣太陽都好似唔得咁，司機唔係咁都頂唔住卦。
　　古語有云「近朱者赤，近墨者黑」，以前殖民地時代近得外國人多可能唔識，今天親得強國人民多，似乎進步了不少。