擺款

　　早在個多星期前已經知道灣仔銅鑼灣會在六月二十九日至七月一日有交通改道措施，為的是甚麼，唔使多講，一切只為香港主權移交二十週年。
　　交通改道都唔係第一次，有乜出奇，奇在今年好似戒嚴一樣，主要街道出入口有警察看守，並且設置「水馬」阻擋，將某個區域嚴防，禁止未經許可的人進出。
　　自問個人心地唔係幾好，又唔係在灣仔附近返工，話之你返工放工塞到死，要生仔入唔到醫院，去食飯遲到等。
　　但係，唔係灣仔銅鑼灣返工唔等於唔使出街，星期五要送貨到金鐘，於是上網查查巴士如何改道。唔上網本來無事，但係一睇所附地圖就暈得一陣陣，怪不得政府工特別係運輸處特別高人工，咁複雜的巴士改道圖都可以製作得咁精美，圖中二十六個英文字母幾乎用盡，這張圖究竟有無人識睇的確存疑。
　　為了表示讚賞，所以將此圖留為記念，好讓將來再有機會如此封路改線時作為參考，提早作好心理準備，無謂以為唔知發生咩事咁大陣象，係屬於自己的地方都咁驚，去到外國莫非唔使出街？
　　搞咁多，無非都係擺官威，顯示自己的重要。在一班愚民面前都要咁，其他如何就係人都知喇。