妹仔發呆

　　早上起來拉開窗簾，見外面下著大雨，就算擔遮也會濕身，一時間未知一會能否如常出發。既然暫時沒法外出，先嘆個早餐再作打算。
　　巴里Mercure酒店的早餐較為豐富，可自己配製靚菜沙律，也有樽裝乳酪及水果杯，麵包亦有多款，咖啡是義大利名牌，由侍應專門調製，而果汁任飲，最能滿足仍是口腔期的中國人。話就咁話，其實食唔多，只是咖啡飲多了一杯。
　　本來食飽準備離開，但見雨勢並無減弱，於是妹仔坐在窗邊，飲著咖啡一面發呆一面看著花園，諗諗如果真係全日落雨的話，如何打發時間。這時有個人將連在褸上的帽反出來，冒雨走了出去，帶點無畏風雨的精神，妹仔覺得雖然怕凍又怕濕，也喜歡發呆，但係無理由因少許風雨而要將行程取消，又不是雷雨，只要有所預備一人一把遮，帶多條吸水巾包相機電話，一於出發往更南部——萊切，這個巴洛克城市探個究竟。