種花

　　潮流興綠化，無論去到邊都話要種幾盆花，家中地方細，就話種在花盆中，但係街外有公園有圍欄，唔知點解亦唔知邊個想到要種在半空。

　　早前已見香港仔海傍的燈柱上，大概中間位置安裝了幾個膠盆，初時還以為是向上的照明系統，後來見工作人員在膠盆上放入已種出花朵的盆栽，才知是膠盆中再放花盆。

　　至於如何淋水，見工作人員將一個膠桶改裝，下面裝了四個轆，上面出口加一個噴水器，一面拉著一面替膠盆中的花盆灑水，結果可想而知，必然天一半地一半，淋水之餘更可替地上灑水。

　　種於燈柱一半位置的盆栽，比人的視線高約三呎以上，除非垂掛的植物，否則如何欣賞也是一個謎，種得靚唔靚要唔要修剪，基本上無人能夠睇到，除非有把梯攀高才能知道。

　　為何有此設計，相信也與錢多到唔識使有關，或許有個高人提供了意見，半空種花也能產生另一種美感也未可料。

　　人如何欣賞花會否凋謝則唔係眾人所能關心，做咗就算向來是我們所追求。