女皇頭

　　本來唔知應該係英女王還是英女皇，睇完才子決定用英女皇。

　　開始收集硬幣，由俗稱男人頭開始，當時根本唔知個男人頭係邊個，只知與用開的硬幣唔同，覺得罕有，於是每見一個收集一個。

　　小時候唔會多錢在身，父母親給一毫子買麵包做早餐，每天就只有一毫子，如果真係男人頭的話而又想收藏，只好唔買麵包，餓一餐半餐無所謂。

　　到後來做童工（上世紀七十年代初），收集散銀機會多了，才見男人頭五毫甚至五仙，其他幣值卻不多見，那時英女皇已登基二十多年，硬幣早改為女皇頭像。

　　唔係唔想收藏，而係根本唔夠用，一毫兩毫五毫一蚊兩蚊五蚊都係錢，搭巴士經常無散銀，怎可長期收集，結果在八十年代逐漸減少興趣，大概只留下一個小鐵罐的硬幣。

　　這天找幾個出來，男人頭無幾多個，大部分屬英女皇頭像。一九七零年代女皇較年輕，一九八零年代顯得成熟，還有條珠鍊。

　　成日聽人講「戀殖」。所謂戀，係要有得戀才可戀，無得戀連單戀也不能。