街坊

　　早上碰到一位相熟的巴士司機，經過一個巴士站之後，聽他發了一陣牢騷。
　　「你睇吓，又話係街坊，大家住在同一區，後面的人要上巴士，站在前面的人無話禮讓吓讓一讓畀人上車，唔止咁，仲要叉開雙手掛住睇住個電話阻住晒，仲話係街坊喎。」
　　聽落真係幾有趣。
　　的確係，自從人手一個智能電話之後，只管頭耷耷睇住個電話，無論行街等車都無話留意身旁事物，更何況係人，阿爸阿媽老婆仔女係旁邊都唔知，像以前所講「老竇姓乜都唔知」一樣。
　　有一天在巴士站等巴士，見兩個貌似地盤工人來到，似乎要找所乘坐的路線，其中一人手中拿著香煙，另一個立刻說：「唔好食煙呀，係巴士站食煙會畀人鬧呀。」
　　那個人好像聽不見，另一個又說：「快收好支煙，唔好食煙呀，巴士站唔食得煙。」
　　那個人終於聽見，拿起香煙將著火的部分弄熄然後放入煙盒，兩人繼續睇站牌上的路線圖。
　　連經過的人都知巴士站唔食煙或最好唔好食煙，但係住在附近的街坊似乎唔知，每天無論經過或者一同等車都係要手中拿著香煙，唔到上車前最後一刻都唔捨得掉了支煙。
　　有這樣的街坊，唔知好運還是不幸了。