牛奶

　　自細喜歡飲牛奶，那時買唔起牛奶公司的鮮奶，只有由奶粉沖成的牛奶，外國產品好一點，無咁多錢只能買大陸奶粉，可惜沖出來一嚿嚿，味道差好遠。

　　鮮奶味道係唔同，慳幾日早餐夠錢買支鮮奶，係都唔買牛奶公司，選擇大嶼山神學院出品的十字牌鮮奶。唔係成日買得起亦唔係周圍有得賣，想飲都唔係咁容易。

　　直至牛奶公司出了牛奶飲品金蓋奶。當年分別鮮奶與牛奶主要睇個蓋，銀蓋為鮮奶，金蓋則是牛奶產品，雖有牛奶成份，多以奶粉製造，味道略淡，營養成分稍遜，從此變了飲金蓋奶。

　　出來工作後少飲了鮮奶，大陸奶粉亦不再買，改為每逢出糧日子，必定到國貨公司買幾樽光明牌鮮奶，補償飲不到大陸奶粉那份失落。

　　光明牌鮮奶有回樽服務，要洗過後才可回樽。未知是否與路途較為遙遠有關，光明牌鮮奶較容易變壞和有沉澱，幸好有得更換。

　　現時當然唔敢再飲某地的牛奶，怕變成大頭仔，不過想飲牛奶製品比從前方便得多，這款由十字牌與意大利合作出產的牛奶，妹仔一見地圖想也不想便買了一排，這兩天人手一盒，懷念曾經擁有過的快樂日子。