精神分裂

　　話說陶才子最怕別人批評他人格分裂，其實他都係正言若反兼搵兩餐，講一套做一套點難到佢。講開人格分裂，知識分子何止人格分裂，仲有精神分裂，搞到普羅大眾唔知佢地講真定講假，一時一樣，所以話，知識分子講話千祈千祈千祈唔好信，信就自己找死。
　　好似報紙咁，係A2A3版就講特區香港賭博年輕化，幾歲已經開始賭錢，連大人都知道，之後一段就會叫人唔好賭錢呀，又有戒賭熱線提供，講到賭好似十惡不赦，凡賭必仆街咁。點知過得兩日，頭版A1竟然刊登六合彩有成過億彩金，如果中獎就發達云云，寫到買六合彩點好點好，唔中都可當做善事，又話點樣投注如何大包圍，誓要全民參與。究竟係唔係呀？
　　唔知買六合彩叫唔叫做賭呢？
　　好啦，當地產霸權殺到埋身，A2A3版開始聲討炒樓如同作奸犯科，義正辭嚴話搵快錢係罪惡，教訓年輕人應該腳踏實地，不要貪圖一時之快參與炒樓，唔係好容易炒燶，講到有層樓者與無產階級對立，幾乎要批鬥。點知又過得幾日，A1頭版大字標題報道，一個三十二歲才俊，以一年時間買出買入幾層樓，咁就搵幾億，坐擁巨資兼住半山豪宅，成為城中佳話，還暗示這才是學習對象，特區香港之希望。
　　唔知炒樓係未特區香港的價值呢？
　　一時又叫班女仔唔好貪慕虛榮，轉頭就話邊個嫁個有錢人。一時叫人唔好未婚生仔，要戴眼識人，轉頭即祝賀某人唔使結婚可以生幾個仔女。本來報新聞沒有對錯之分，但係每當講到這些「喜事」時卻充滿興奮，多從讚賞角度落筆，唔係點會大字標題雞乸咁大個字講成幾日。
　　終於講到一人一票，A2A3A4A5都話民主好，批評沒有民主的地方必然是獨裁，既要「教導」市民爭取一人一票，「大罵」紅色中國沒有民主也不給特區香港民主，講到特區香港有了一人一票選舉好似妙藥靈丹，令到愚民信以為真，以為佢地真係咁熱心。點知真係過得幾日，A1A2雞乸咁大個字介紹振英哥唐唐弟范夫人，又話誰參選仲搵人民調，調查邊個受歡迎邊個無咁受歡迎，整到好似每個特區愚民都有得投票咁。
　　唔知特首選舉係未特區市民有得參與投票呢？
　　如果唔係，唔該唔好報邊個選邊個唔選，關人鬼事，你地班人咁鍾意做神（做鬼）做到夠，千祈千祈千祈唔好搵讀者笨。所以話這班高級分子人格分裂、精神分裂，何止講一套做一套，直情係識講唔識做，分分鐘畀佢地跣一鑊。