新華書店

　　第一次來大陸旅行，到達目的地安頓好之後，第一件事就係找間新華書店，當然唔係為了買書，亦無咁勤力，而係買張地圖，上世紀七八十年代，無張地圖連巴士都唔知係邊度搭。

　　踏入二十一世紀過了二十五年，新華書店依舊，仍是以售賣書籍為主，但其功能已有所改變，想找想睇的書，可以去較大而且齊全的書城，可以找到連特區香港都買唔到嘅書，同樣叫新華書店，至於較為細間，可以有自己的名稱，包括這間位於崇文門外的花市書店，應該也屬於新華書店的。

　　這間書店，主銷書籍，小說哲學文學翻譯的書都有，包括蔡瀾，也有小時候在後巷理髮鋪所睇的連環漫畫冊，長方形細細一本，幾本一個故事，歷史名著在其中，不過今天的內容有些變化。

　　另有一層設有課本出售，主要為應付初中與高考，也有大學考試內容與練習課程，價錢並不便宜，側看今天中國的學生考試壓力也不少。

　　文具攤位唔少得，貴價而精美，主要吸引一批較為富裕的學生。從前曾經擁有一塊施得樓的膠擦已經可以開心幾年（因為唔多捨得用），中華牌鉛筆亦有新款，價錢和日本牌子有得比，至於斑馬牌原子筆這裏也有得出售。

　　地下一層佔地甚廣的部分，主要出售旅遊紀念品之類，可惜對我們來說唔多吸引，大概對於清朝有少許偏見吧，帝制好像早已遠去——其實也不過一百年，可是隱約仍見影子。