即熱飯

　　經過專售泰國產品的小店，鄉下婆發現了一盒「自熱飯」，封面寫明不用微波爐，內有齊發熱物料，只要依著指示，十分鐘後有個熱飯，於是買來嘗試。

　　泰國產品很多，看似平日並不常用，原來每日所食的白米，主要來自泰國，近來喜歡了來自泰國北部的苿莉香米，雖然價錢稍貴，好味已經值回。

　　我們主要食糧——白米，產量最多唔係中國，唔知點解自細就聽「以農立國」，可惜一講農產品，幾乎無一樣屬於自己，真覺慚愧。

　　這款自熱飯，盒內有齊所有，包括一盒飯與叉匙紙巾，一包配餸，一包水，一包發熱物料，外有一個膠盒及墊底的紙皮。依指示拆開發熱物料放底，加入水後依次序放入飯與餸，蓋好，未幾已聽到水滾的聲音，蒸氣從兩旁噴出，等至十分鐘後打開，水已揮發，飯及餸已熱。

　　把餸倒入飯中便可進食，至於味道，當然沒有即蒸咁好味，算是不錯，只是份量略少。

　　日本有即食麵意大利有即食意粉，加入熱水便可，今次泰國竟然可以附上發熱包自熱，連煲水也省卻，適合戶外工作而又沒有煮食工具的人享用，唯一可惜食後剩下大批膠袋膠盒不知如何處理，幸好泰國日本等文明國家對廢膠回收有成效，在特區香港則唔多建議買來食——因為這裏唔識處理廢膠，雖說支持泰國產品，還是買多幾包靚米算喇。